
马尔巴大师教言集MARPA35མ་ཧཱ་མཱ་ཡཱའི་གདམས་ངག་བཀའ་བགྲོས་དོན་དྲུག
2-1-122b
༄༅། །མ་ཧཱ་མཱ་ཡཱའི་གདམས་ངག་བཀའ་བགྲོས་དོན་དྲུག
༄༅། །མ་ཧཱ་མཱ་ཡཱའི་གདམས་ངག་བཀའ་བགྲོས་དོན་དྲུག་བཞུགས་སོ། །ཌཱ་ཀི་མ་ཐམས་ཅད་ལ་ཕྱག་འཚལ་ལོ། །རྣལ་འབྱོར་ཆེན་པོའི་རྒྱུད་ལས། ར་ས་དང་ཡ་ན་གཉིས་བཅུད་ཀྱིས་ལེན་གསུངས་པའི་དོན་ནི། རྣལ་འབྱོར་མའི་བཀའ་དྲུག་པོ་འདི་ཡིན་ཏེ། དེ་ཙ་ར་ས་ནའི་དོན། [ལེའུ་དང་པོ་ལས་འཆི་བ་མེད་ཅིང་རྒས་པ་མེད། རྣལ་འབྱོར་སྒྱུ་མའི་རགས་པ་འདི་ཞེས།] བཅུད་ནི་ལུས་སྒྲུབ་པ་སྟེ། མཐོ་རིས་བསྒྲུབ་པ་དང་། ཡ་ནའི་དོན་ལེན་པ་ནི་སེམས་བསྒྲུབ་པ་སྟེ། ཐར་པ་བསྒྲུབ་པའོ། །དེ་ལ་ལུས་བསྒྲུབ་པ་ནི། རྒས་པ་བཅིང་བ་དང་། ན་བ་བཅིང་བ་དང་། འཆིང་བ་བཅིང་པའོ། །དེ་ཡང་འདི་ལྟ་སྟེ། ལུས་ངག་སེམས་ཀྱི་གཡེང་བ་ཐམས་ཅད་སྤངས་ཏེ། བཟའ་བཏུང་ཚད་ལས་རྒལ་བ་དང་ལུས་ཀྱི་དྲག་ཤུལ་ངལ་དུབ་ཀུན་སྤངས་ལ། རྣ་ཁུང་རས་ཀྱིས་དམ་པོར་དགག་གོ །ཉིན་ཞིང་རྣ་ཁུང་ཐབས་གཡས་པ་རས་ཀྱིས་དམ་པོར་དགག་གོ །མཚན་ཤེས་རབ་ཞིང་ནི་གཡོན་པ་དགག་གོ། །ཨུ་རྒྱན་གྱི་སྒོ་བཅིངས་པ་ཞེས་བྱས་ཏེ། [ནུབ་ཕྱོགས།]
2-1-123a
རས་ཆག་འཕྲན་གྱིས་ཡུ་ན་གུའི་འཚམསa་(མཚམས་)ལྷག །ནས་ལྟོང་ལྟོང་པོ་ནས་གྱེན་དུ་ཀྱོགས་ནས། སྐྱེད་པ་དཀྲིས་ལ་སྒྱུ་ཞབས་སུ་ལྟག་སྐོར་ཅིག་བྱས་ཏེ། འདོམས་ནས་ཡར་འཐེན་ལ། རྒྱབ་ཀྱི་རྩ་རལ་ནས་[སྣ་བུག་ཟེར།] མར་ཡང་འཐེན་པས་གཤང་གཅིའི་སྒོ་དམ་དུ་བསྡམས་ལ། དུས་ཐམས་ཅད་དུ་སྒོ་གཉིས་པོ་བཙུམ་མེ་བྱའོ། །གཤང་བའི་ཚེ་བསལ་བར་བྱ། གཤང་བའི་རྟ་པ་ཡང་སྒྱུ་ཞབས་སུ་སྐུམས་(སྐུམ་)ལ་སྟོད་གསུས་པ་སྦུག་བསྡམས་པ་ལན་གཉིས་གསུམ་བྱའོ། །འདུག་པའི་ཚེ་ཡང་ཏིང་(རྟིང་)པས་རྡོ་རྗེའི་རྩ་བ་མནན་ལ་འདུག་གོ། །ཉལ་བའི་ཚེ་ན་ཡང་གན་སྐྱལ་དུ་མི་རུང་། ཟུར་ལ་ད་སྦུས་བྲང་དུ་སྦྱར་ལ་གུམ་མེ་ཉལ་བར་བྱའོ། །སྤྱོད་ལམ་དེས་ཉེ་ཚེ་ཡན་ཆད་ཁྱེའུ་གསུས་ལ་མི་སྐྱོད་པར་བཏང་ལ། ཁུར་གང་རྔུབས་ལ་དེ་ཁྲོག་གེ་ཁྲོག་གེ་བསྲུབས་པས་[འོག་རླུང་།] བ་ཙ་ལ་སོགས་པའི་སྐྱོན་སྦྱངས་ཏེ་སྣོད་གཞན་ཞིག་ཏུ་བླུགས་ལ་ལྕེ་སོ་བཞར་ཞིང་[ཐོ་རངས་ལྟོ་སྟོང་ལ།] ཁུར་(མཁུར་)བ་གཞིབས་(གཞིབ་)ལ་[ཟེར་ཡང་ཁྱི་ཐོད་པ།] ཧག་བྱས་ལ་དོར་རོ། །[ཡུན་རིང་རབ་དུ།] ཡང་དེ་ཉིད་མཁུར་བར་རྔུབས་ལ་སྔ་མ་བཞིན་བྱ་སྟེ། དེ་ལྟར་ལན་གསུམ་བྱའོ། །དེ་ནས་མདང་ནས་མི་བསྐྱོད་པས་གཤེར་བའི་རས་ལ་བཏུམས་ཀྱང་རུང་སྤངས་ཀྱང་རུང་བའི་ཨ་རུ་ར་རྡོག་གཅིག་ཁར་ནམ་ནེམ་ཙམ་བྱས་ལ། དེ་རས་ཆག་ཕྲན་ལ་གཏུམས་ལ། 
2-1-123b
མི་བསྐྱོད་པ་བཙིར་བར་བྱའོ། །ཡང་ཁར་བཅུག་སྟེ། སྔ་མ་བཞིན་དུ་བྱ་སྟེ་སྤྱིར་ལན་གསུམ་བྱའོ། །དེར་པྲ་ན་བཤམས་པའི་བུ་མོ་གཞོན་ནུ་དང་འདོད་ཆགས་སྤྱད་པའི་ཁུ་བ་དང་། རས་བལ་ལམ། བལ་ལ་བསྒོས་པ་དེ་ཡང་ཐིགས་པ་གསུམ་ཙམ་དུ་བཙིར་རོ། །ཁམ་ཕོར་རྩེའུ་སོར་གཉིས་ཐིགས་པ་གཅིག་ཏུ་བླུགས་ལ། [བྷ་གའི་ནང་དུ་ཅི་ཡི་ཨཀྴོ།] སྦུགས་གང་ནས་རྒྱུ་བའི་སྣ་བུག་ནས་བཏུང་། [བཅོ་ལྔ་ཕན་ཆད་མདོག་སྔོ་བ་སྲིན་ལག་ལ་དཔལ་བེའུ་ཡོད་པ་ཟླ་མཚན་འཛག་པའོ། །[བཅོ་ལྔ་ཕན་ཆད་མདོག་སྔོ་བ་སྲིན་ལག་ལ་དཔལ་བེའུ་ཡོད་པ་ཟླ་མཚན་འཛག་པའོ། །]]ཕྱེད་སྣ་བུག་གཅིག་ནས་བཏུང་། གླད་པའི་དཀྱིལ་དུ་སོང་བར་བསམ་ཞིང་ཁོང་དུ་བཏུང་ངོ་། །དེ་ནས་དཀྱིལ་མོ་དཀྲུང་བཅས་ཏེ་ལག་མཐིལ་གཉིས་པུས་མོ་ལ་བཀན་ལ་ས་ཀ་ར་ན་བྱ་སྟེ། གསུས་པ་གཡས་ནས་ལན་གསུམ་དྲག་ཏུ་བསྐོར། དེ་བཞིན་དུ་གཡོན་ནས་ཀྱང་ལན་གསུམ་ལ་འོག་སྒོ་བསྡམས་ཏེ། རྒྱུ་ཞབས་ཚིགས་པ་ལ་སྦྱར་ལ་རླུང་གི་ཕོ་[རེ་རེ་ལ་རླུང་བཅིང་པ། བ་བཀང་སྟེ། སྟོད་གསུས་བྱ། ཁ་སྣའི་རླུང་བསྡམས་ལ་ཀོས་གོས་(ཀོས་)སྐེ་ལྟོང་ལྟོང་པར་བཅུག སྦུགས་(སྦུག་)ཐུབ་ཚད་དུ་བསྡམ་མོ། །མི་ཐུབ་ན་སྦུགས་(སྦུག་)དལ་གྱིས་བཏང་ལ་ཡང་དེ་ལྟར་ལན་གཉིས་བྱ་སྟེ། སྤྱིར་ལན་གསུམ་བྱ། དེ་ཕྱེད་དཀྱིལ་དུ་པུས་མོ་གཡས་པ་བསླང་ལ། དམ་ཚིག་ཏུ་མུ་ཏྲེ་བསྡམ་ལ། གཡོན་པའི་གྲུ་མོ་བླ་སྒང་གཡས་པ་ལ་རྒྱབ་གཏད་ལ་ཁ་ཡང་གཡས་སུ་གཅུས་ལ། 
2-1-124a
དེ་ནས་ལག་པ་གཡས་ཀྱིས་གཡོན་པ་བཏུབ་ཚད་ཕར་འཐེན་ལ་དབུགས་རྔུབ་པ་དང་བཅས་པར་ཁ་ཡང་དལ་བུས་གཡོན་དུ་བཏུབ་ཚད་བཅུས་ལ། དབུགས་ཐུབ་ཚད་དུ་ནང་དུ་བསྡམ་ལ་བསྡོད་དོ། །མི་ཐུབ་ཙམ་ན་ལག་པ་དང་པུས་མོ་ས་མའི་(མལ་)སོར་བཞག་ལ། དབུགས་དལ་གྱིས་བཏང་བ་དང་བཅས་པ་གཡས་སུ་བཅུས་ལ་སྔ་མ་བཞིན་དུ་ལན་གཉིས་བྱ། སྤྱིར་དེ་ལྟར་ལན་གསུམ་བྱའོ། །དེ་བཞིན་པུས་མོ་གཡས་པ་རྙལ་(བསྙེས་)ཏེ། གཡོན་བསྒྲེང་བ་དམ་ཚིག་ཕྱག་རྒྱ་ཡང་གྲུ་མོ་དེའི་ཅིའི་གཡས་པའི་རྒྱབ་གཏད་ལ་ཕར་འཐེན་ཁ་ཡང་གཡོན་དུ་བཅུག་སྟེ། དབུགས་རྔུབ་པ་དང་བཅས་པས་གཡས་པར་གཅུ་སྟེ། དེ་དབུགས་ནང་དུ་བསྡམས་ཏེ་ཐུབ་ཚད་དུ་བསྡམ་མོ། །མི་ཐུབ་ན་དབུགས་དལ་གྱི་བཏང་ལ། སོར་མོ་ཐོན་དེ་བྱ། དེ་ཁོ་ན་ལྟར་ལན་གཉིས་བྱ་སྟེ། སྤྱིར་ལན་གསུམ་བྱ། དེ་ནས་ཁྲག་སྦྱང་བའི་ཆོ་ག་མགོ་གཡས་ནས་བསྐོར། གཡོན་ནས་ཀྱང་དེ་བཞིན་ནོ། །དེ་ནས་མགོ་གཡས་སུ་ལན་གཉིས་སྤྲུག གཡོན་པ་ཡང་གཉིས་སྤྲུག་སྟེ། དེ་ཟླ་བ་དྲུག་ཏུ་སྤྱད་ན་རྟགས་ཨོལ་འདུད་པ་མེད་པ་ལ་སོགས་པ་འབྱུང་སྟེ། འབྲས་བུ་གཉེར་མ་མེད་པ་དང་། སྐྲ་དཀར་མེད་པ། ནད་ཐམས་ཅད་ལས་གྲོལ་བ་དང་། ཉི་ཟླ་དང་ཚེ་མཉམ་པར་འགྱུར་རོ། །ཕྱིས་ནི་ཟླ་བ་ཕྱེད་ཕྱེད་ཅིང་
2-1-124b
ཕོགས་རེ་སྤྱད་པར་བྱའོ། །དེ་ཙམ་གྱིས་ནི་རྒས་པ་དང་། ན་བ་དང་འཆི་བ་བཅིང་པར་འགྱུར་རོ། །དེ་ཡན་ཆད་ར་ས་བཅུད་ལེན་ནོ། །ཡང་ན་ནི་དོན་ལེན་པ་སྟེ་སེམས་སྒྲུབ་པ་ནི་གསུམ་སྟེ། རླུང་བཅིང་བ་དང་། ཨུ་དང་ཐིག་ལེ་བཅིང་(བཅིངས་)པའི་ཚིགས་སམ། གང་གང་དབང་པོ་བསྡམས་ནས་ནི། །སྦྱོར་དང་སྡོམ་པ་བྱེད་པར་འགྱུར། །བྱང་ཆུབ་ཀྱི་སེམས་ཁུ་བ་བཅིང་བའོ། །རླུང་བཅིང་པ་ནི་ལུས་དང་སེམས་ཀྱི་གཡེང་བ་ཐམས་ཅད་ཕངས་(སྤངས་)པས་བླ་གབ་ཅན་ནམ། གལ་ཏེ་མེད་ན་གྲིབ་ཕྱོགས་སུ་ཁ་བལྟས་ཏེ། སྣའི་རྩེ་མོ་འབའ་ཞིག་ལ་སེམས་གཏད་དེ། མིག་མི་འགྱུར་བར་བྱའོ། །དེ་ལྟར་ཐུན་འཚམས་(མཚམས་)ཀྱི་བསྒོམ་པ་གོམ་པ་ལས། མཐར་མིག་ན་བ་དང་རྩུབ་པ་དང་། འཆི་མ་འབྱུང་བ་མེད་པར་ཉིན་ཐལ་ཆོད་དུ་སྣ་རྩེར་སེམས་ཟིན་ཅིང་མིག་གི་(གིས་)བལྟ་བར་ནུས་ན། དེའི་ཚེ་གདོན་མི་ཟ་བར་སྟེང་གི་རླུང་འགག་པར་འགྱུར་བ་ཆོས་ཉིད་དེ། འདི་རླུང་བཅིང་པའི་ཆོ་གའི་མཆོག་ཡིན་ནོ། །དེ་ནས་གཡེང་བ་ཐམས་ཅད་སྤངས་པའི་རྣལ་འབྱོར་པས་གནས་དགའ་ཞིང་བདེ་བར་རང་གི་ཆགས་ལ་སོགས་པ་གོན་ནས་རྒྱུས་སུ་བཅུག་ལ། ཕྱི་བ་ཐམས་ཅད་བསྒྲུབ་གཡོག་ལ་བསྐོས་ལ་རང་མིག་ཅི་བདེ་བར་རྫས་ལ་སྣ་རྩེའི་ཐད་ཀར་སོར་གཉིས་ཙམ་གྱིས་དགྱེ་བའི་ནམ་མཁའ་སྟོང་སེང་ངེ་བ་དེ་ཁོ་ན་ལ་ཉིན་མཚན་མེད་པར་མིག་གིས་བལྟ་ཞིང་
2-1-125a
སེམས་རྩེ་གཅིག་ཏུ་གདམས། གདམས་ངག་གཞན་ལ་སྟོན་ན་ལ་སྣ་རྩེའི་ཐད་ཀར་སོར་གཉིས་ཀྱི་ཐད་ཀའི་ནམ་མཁའ་སྟོང་སེང་ངེ་བ་དེ་ཁོ་ན་ལ་དཔེ་མེད་པའི་ལྟ་རྒྱུ་ཞིག་ཡོད་ཀྱིས་མ་ཡེངས་པར་ལྟོས། མ་ཡེངས་མ་ཡེངས་པར་ངོས་དེའི་ཚེ་མིག་གིས་གི་སུ་གྱེན་དུ་ལོག་ལ་མི་བལྟ། གཡས་གཡོན་ཟུར་མི་སྣ་རྩེ་ལ་ཡང་མི་བལྟ། ཚོ་མ་གསལ་ཆེ་ན་ཡང་སྟོང་སང་ངེ་བ་མ་ཤོར་བར་ལྟ་བ་བསྐྱེད་པ་ལ་འམ་སྐྱེ་ལུས་གཅུས་ལ་འོ་ལེ་ཙམ་དུ་བལྟས་ཏེ། གཟུགས་གང་ལའང་གསལ་པོར་མི་ལྟ། ཐ་ན་ཆགས་པར་འགྲོ་བའི་ལམ་མེ་ཡང་གསལ་པོར་མི་བལྟའོ། །དེས་ནི་གཉིད་ལོག་པ་མ་གཏོགས་པར་དུས་ཐམས་ཅད་དུ་སྟོང་སང་ངེ་བ་དེ་ཉིད་ལ་བལྟས་ན་དཔེ་མེད་པའི་ལྟ་རྒྱུ་སྲིད་པ་གསུམ་ས་ལེ་བ་དེ་མཐོང་བར་འགྱུར་རོ། །དེ་བས་ན་བསམ་གཏན་དཔེ་ནི་ཆོས་ཉིད་ཀྱི་དོན་དམ་པར་མི་རྟོག་པའི་ཡེ་ཤེས་སྐྱེ་སྟེ། འདི་ནི་ཡིད་བཅིང་བའི་ཐབས་ཀྱི་མཆོག་གོ །དེ་ནས་ཕྱག་རྒྱ་དང་སྙོམས་པར་འཇུག་པས་བྱང་ཆུབ་ཀྱི་སེམས་རྡོ་རྗེ་ནོར་བུར་སོང་བ་དང་། སྔར་གྱི་སྣ་རྩེའི་སྟོང་པ་ལ་བལྟས་པ་ཙམ་གྱིས་ཁུ་བ་ཕྱིར་མི་འཆོར་རོ། །དེ་བདེ་བ་ཆེན་པོས་ལུས་ཐམས་ཅད་ལ་ཁྱབ་པ་ལྷན་ཅིག་སྐྱེས་པ་མངོན་དུ་འགྱུར་རོ། །འདི་ནི་ཁུ་བ་བཅིངས་པའི་མཆོག་གོ། །ཨུ་རྒྱན་གྱི་རྣལ་འབྱོར་མ་ལྷན་ཅིག་སྐྱེས་མ་རྣམས་ཀྱིས་དབུས་མཐའ་བགྲོས་དོན་དྲུག་པོ་འདི་གསུངས་པ་ཡིན་ནོ། །ཨྠིི།། །།
2-1-125b
༄༅། །དེ་ནས་མེ་རླུང་ལ་ཐིམ་པས། ནད་གཡོག་པས་བལྟ་རྒྱུ་ལུས་ཀྱི་དྲོད་འཆོར། རང་ལ་སྣང་བ་སྲིན་བུ་མེ་ཁྱེར་ཙམ་དུ་སྣང་། དེའི་དུས་སུ་ཏ་ལ་ཤེས་པ་གཞག དེ་ནས་ཆུ་མེ་ལ་ཐིམ་པས་ནད་གཡོག་པས་བལྟ་རྒྱུ་ཁ་ཆུ་སྣ་ཆུ་མིག་ཆུ་སྐམས་ནས་འགྲོ་རང་ལ་དེ་དུས་སུ་སྣང་བ་ཐམས་ཅད་དུ་བའི་རྣམ་པར་བུན་བུན་པ་འོང་། དེའི་དུས་སུ། ནུ་ལ་ཤེས་པ་གཞག ༄༅། །དེ་ནས་ཆུང་རྣམ་པར་ཤེས་པ་ཐིམ་པས་ནད་གཡོག་པས་བལྟ་རྒྱུ་རྒྱུ་ཐུགས་འབྱུང་དུ་ཤིན་ཏུ་རྐང་། དེའི་དུས་སུ་སྣང་བ་ཐམས་ཅད་མར་མེ་བཞིན་འོང་ཅིག སལ་བའོ། །དེ་ནས་དབུས་ཀྱི་ཨ་པ་ཤེས་པ་གཏད་ནས། བསྒོམ་པའི་ཉམས་དང་བསྲེས། རླུང་ཁྱོད་རང་གར་འགྲོ་རྒྱུ་མ་འགྲོ་རྒྱུ། ཤེས་པ་དང་རྣམ་རྟོག་འོད་གསལ་དུ་བ་པས། འབྲས་བུ་ཆོས་སྐུ་ཐོབ། འོད་གསལ་གྱི་གདམས་པ་སྟེ། འཆི་ཁར་བསྒོམ། ཨྠིི།། །།༄༅། །དུས་འཆི་བའི་དུས་སུ་ལུས་ཙོག་བུའི་གློ་གཡས་གཡོན་པ་ཕབ་ལ་ཉལ། འབྱུང་བ་ས་ཆུ་ཐིམ་པས་ནད་གཡོག་པས་བལྟ་རྒྱུ་འཆི་བ་པོ་དེ་ལ་ལུས་ཟུག་མི་ཐུབ་པ་འབྱུང་། རང་ལ་དེའི་དུས་སུ་སྣང་བ་ཐམས་ཅད་སྤྲིན་གྱི་རྣམ་པ་ལྟ་བུར་ལང་ལོང་བུ་འོང་། དེའི་དུས་སུ་ཤེས་པ་ཨ་ལ་གཞག །
2-1-126a
༄༅། །ལུས་མེད་ཡེ་ཤེས་མཁའ་འགྲོའི་སྙན་བརྒྱུད་བཞུགས་སོ། །རྒྱ་གར་སྐད་དུ། ཤྲཱི་བཛྲ་ཌཱ་ཀི་ཎྀ་ཀ་ཡ་ནི་དྷརྨ་ན་མ། བོད་སྐད་དུ། དཔལ་རྡོ་རྗེ་ལུས་མེད་མཁའ་འགྲོའི་ཆོས་ཞེས་བྱ་བ། ཡེ་ཤེས་ཀྱི་མཁའ་འགྲོ་ལ་ཕྱག་འཚལ་ལོ། །གང་ཞིག་འཇིགས་རུང་དུར་ཁྲོད་ཆེན་པོར་ཕཊ་ཕཊ་རྔམས་པའི་སྒྲ་སྒྲོགས་ཅིང་། །མཁའ་འགྲོ་ཟ་བྱེད་མུན་པའི་ནང་ན་ཟླ་ཤར་ལྟ་བུར་རབ་ཏུ་འབར། །ཧཱུཾ་ཧཱུཾ་ཞེས་བརྗོད་ཤ་ཟ་རོ་ལངས་མ་མོའི་ཚོགས་རྣམས་སྐྲག་མཛད་པ། །གསང་སྔགས་གསང་མཛོད་མངའ་བདག་བདེ་ཆེན་རྒྱལ་བའི་སྐུ་ལ་འདུད། །ཨེ་མ་ཧོ། པདྨ་རིན་ཆེན་ཆུ་བོའི་གཞུང་། །སེང་གེ་གླང་ཆེན་རི་དྭགས་ལྟར། །ཉི་མ་མེ་དང་ཤེལ་དང་མཚུངས། །ཨེ་མ་ཧོ། སྐལ་ལྡན་རྣམས་ཀྱིས་རྟོགས་པར་གྱིས། །རང་བཞིན་ཆོས་དབྱིངས་རྣམ་དག་བདེ་བ་ཆེན་པོའི་ཀློང་། །དག་པའི་གཞལ་ཡས་ཆོས་ཀྱི་འབྱུང་གནས་རྡོ་རྗེ་བཙུན་མོ་སྟེང་། །ཤ་ཟ་སྨྱོན་པ་བུ་ཆུང་བཞིན། །སྤྲིན་དང་ནམ་མཁའ་གློག་བཞིན་དུ། །ལྕེ་སྤྱང་རོ་ལངས་ས་ར་ས། །ཨེ་མ་ཧོ། སྐལ་ལྡན་རྣམས་ཀྱིས་ཉམས་སུ་ལོངས། །རྒྱལ་བ་རྣམས་ཀྱི་རྟག་ཏུ་མཉམ་གཞག །འོད་གསལ་ཆེན་པོའི་ངང་དུ། །དུས་གསུམ་རྟག་ཏུ་རྒྱུན་མི་འཆད་བར། །སངས་རྒྱས་སྐུ་གསུམ་དེ་རང་བཞིན། །བདག་གཞན་དབྱེར་མེད་ངོ་བོ་ཉིད་ལ། །ལྷུན་གྲུབ་དབྱེར་མེད་སྤྲོས་དང་བྲལ། །ཨེ་མ་ཧོ་ས་མ་ཐ། 
2-1-126b
ཨེ་མ་ཧོ། གཅེར་བུ་གླིང་པ་རྒྱལ་པོ་འབངས། །བློན་པོ་སྣ་འགྱུར་རྟ་མཆོག་སྟེ། །བྲན་དང་ལམ་ཆེན་བཙུན་མོ་ཡི། །སྐལ་ལྡན་རྣམས་ཀྱིས་རྟོགས་པར་གྱིས། །ས་མ་ཡ། དམ་པ་བདེ་ཆེན་མགོན་པོ་སྐྱེ་མེད་རང་བྱུང་སངས་རྒྱས་ཡིན། །ཨེ་མ་ཧོ། སྨིན་གྲོལ་སེམས་ཀྱི་རྒྱ་མདུད་བཤིག །ཕྱི་ནང་གསང་བ་མཐར་ཐུག་པས། །དབང་གི་རྣམ་པར་རྟོག་པའི་རྒྱུ། །མདུད་པའི་སེམས་ཉིད་རང་གྲོལ་དུ། །རྟོག་པའི་དྲྭ་བ་བཤིག་པ་ཡིན། །རང་བཞིན་བདེ་དང་བཞག་པར་བྱ། །དམ་ཚིག་རང་སེམས་མེ་ལོང་ལྟོས། །ཨ་ཧཾ་སྲོག་རྩོལ་སཾ་བྷ་ར། །སེམས་ཉིད་རང་གསལ་མེ་ལོང་ལ། །དབང་གིས་འབྲས་བུར་མཐར་ཕྱིན་པས། །ལོག་རྟོག་འཁོར་བའི་དྲི་མ་ཕྱིས། གདོད་ནས་དག་པ་ཀུན་གཞིའི་རྒྱུ། །དྲི་མེད་རིག་གསལ་དག་པ་ལས། །སྣང་མེད་རིག་ཙམ་རྒྱུན་དུ་ལྟོས། །རོ་སྙོམ་རྟོགས་པའི་ཉི་མ་ནི། །བདེ་ཆེན་རང་སེམས་སྤྲོས་དང་བྲལ། །རྩ་རླུང་བྱང་སེམས་འགྱུར་བ་ཡི། །གཉིས་མེད་རྡོ་རྗེ་གང་གི་རྟོགས། །དེ་ནི་རྫས་ཀྱི་དམ་པ་མཆོག །ཕྱི་ལྟར་སྣང་བ་སྣ་ཚོགས་པ། །རྟོག་པའི་ཉི་མ་གཅིག་ལ་བདེ། །དེ་ལ་གསལ་སྒྲིབ་མེད་པ་ཡིན། །སྤྱོད་པ་ཆུ་ལ་རལ་གྲི་རྒྱོབ། །གང་དང་གང་སྣང་དེ་དག་ལ། །སྤྱད་དུ་མེད་པའི་ངང་ཉིད་ལས། །སྤད་པར་གྱིས་ཤིག་རྣལ་འབྱོར་པ། །ཆུ་ལ་རལ་གྲིས་གང་བཏབ་པ། །རྗེས་མེད་
2-1-127a
དག་ཏུ་འགྲོ་བ་བཞིན། །ཉམས་ང་མེད་པའི་རལ་གྲི་ཡིས། །སྦས་དང་བརྟུལ་ཞུགས་ཀུ་སུ་ལུ། །མཉམ་རྗེས་མེད་པར་སྤྱོད་པ་བྱ། །རིག་པ་སེམས་ཀྱི་སྤྱོད་པ་གྱིས། །རང་གྲོལ་ཕྱག་རྒྱ་ཆེན་པོར་ལྟོས། །རང་སེམས་གཉིས་མེད་ཕྱག་རྒྱ་ཆེ། །གྲོལ་བ་སེམས་ཀྱི་ངང་དུ་གྲོལ། །ཕྱག་ནི་སྟོང་པའི་ཡེ་ཤེས་ཡིན། །རྒྱ་ནི་འཁོར་བའི་རྒྱ་དང་བྲལ། །ཆེན་པོ་ཟུང་དུ་འཇུག་པ་ཡིས། །ངོ་བོ་རང་བཞིན་མཚན་ཉིད་དེ། །བདེ་ཆེན་དྲི་བྲལ་ངང་དུ་ལྟོས། །ཨེ་མ་ཧོ། དཔལ་ལྡན་རྡོ་རྗེ་མཁའ་འགྲོ་མས། །ནམ་མཁའ་སྟོང་པའི་ངང་ལས་ནི། །བརྡ་སྐད་བྲག་ཆ་ཇི་བཞིན་དུ། །སྟོང་པའི་ངང་ལས་སྙིང་རྗེའི་སྒྲ། །དབྱེར་མེད་བདེ་ཆེན་ངང་ལས་རྫོགས། །སྐལ་ལྡན་བློ་ཡི་པདྨོ་དེ། །ཡེ་ཤེས་ཉི་མ་ཤར་བ་ཡིས། །རང་གྲོལ་ཤུགས་འབྱུང་ཁ་ཟུམ་བྱེད། །བློ་ལྡན་དྲི་མེད་གཟི་བརྗིད་ཁྱོད། །པུ་ལ་ཧ་རིའི་དགོན་པ་རུ། །བྷུ་ཏི་མ་རིག་མུན་པ་སོལ། །ཡེ་ཤེས་སྣང་བས་ཁྱབ་པར་གྱིས། །ཅེས་ཏེ་ལོ་ཆེན་པོས་ནཱ་རོ་ལ་གསུངས་པའོ།། །།དཔལ་ལྡན་འཁོར་ལོ་སྡོམ་པ་ལ་ཕྱག་འཚལ་ལོ། །རྩ་རླུང་དྲྭ་མིག་འཁོར་ལོ་བསྐོར། །རྩ་ནི་ལུས་ལ་གནས་པ་ནི། །ཨ་བ་དྷཱུ་ཏི་ལ་ལ་ན། །ར་ས་ན་ཏེ་དབྱེ་བ་ཡང་། །འཁོར་ལོ་བཞི་རུ་གནས་པའོ། །དྲ་བ་ཞེས་བྱ་འབྲེལ་པས་ཏེ། །རླུང་གི་ལས་ཀུན་བྱེད་པ་ཅན། །ལྔ་ཡི་བདག་ཉིད་
2-1-127b
བཅུ་མིང་སྟེ། །རླུང་སེམས་གཉིས་སུ་མེད་པར་ནི། །མི་རྟོག་འཁོར་ལོ་བསྐོར་བར་བྱ། །རིག་པ་ཡེ་ཤེས་སྒྲོན་མེ་ལྟོས། །རིག་པ་སེམས་ཀྱི་རྒྱལ་པོ་སྟེ། ལྷུན་གྲུབ་ངང་དུ་ཡེ་ཤེས་ཀྱི། །སྒྲོན་མེ་གཉིས་སུ་མེད་པར་འབར། མ་རིག་མུན་པ་བསལ་བྱས་ནས། །ཡེ་ཤེས་དྲི་བྲལ་སྣང་བས་ཁྱབ། །རོ་སྙོམས་ཕྱི་ཡི་མེ་ལོང་ལྟོས། །འབྱུང་བ་བཞི་པོ་རོ་སྙོམས་དང་། །ཤེས་པ་ཏིང་འཛིན་རོ་སྙོམས་ཏེ། །ཉམས་ནི་བདེ་གསལ་རྣམ་པ་བཞི། །སྐྱེ་བ་མེད་པའི་མེ་ལོང་ལ། །དྲན་པའི་རྡུལ་གྱིས་བཀྲ་བ་དེ། །དྲན་མེད་རིག་པའི་ཉམས་ཀྱིས་ཕྱིས། །སེམས་ཀྱི་མེ་ལོང་དག་པ་ལ། །སྣང་བ་གཉིས་མེད་ལྟ་བ་ནི། །རྣམ་རྟོག་ཤུགས་འབྱུང་དྲི་མ་ཕྱིས། །བདེ་ཆེན་གསུང་གི་རིན་ཆེན་ཆོངས། །བདེ་བ་རང་རིག་གསལ་བ་སྟེ། །ཆེན་པོ་བླ་མ་དམ་པའི་གསུང་། །ཟག་བཅས་ལུས་ཀྱི་བདེ་བ་ལས། །ཟག་མེད་སེམས་ཀྱི་བདེ་བ་འཆར། །བདེ་སྟོང་རོ་མཉམ་དབྱེར་མེད་པས། །གསང་བ་མཆོག་ནི་དབྱེར་མེད་པ། །བདུད་རྩི་ཞལ་རྙེད་སྙིང་པོ་འདི། །རིན་ཆེན་ལྟ་བུར་རང་གཞན་དོན། འབྱུང་བས་སྐལ་ལྡན་དམ་པས་ཆོངས། །རྣལ་འབྱོར་དབང་ཕྱུག་ཏི་ལློ་ཆེན་པོ་ཡིས། །བརྒྱན་གྱི་རི་ཞེས་གྲགས་པར་བདག་ལ་གནང་། །གསང་སྔགས་སྙིང་པོ་ལུས་མེད་རྡོ་རྗེ་ཡིས། །རང་བཞིན་མ་ལུས་དེ་རུ་རྫོགས་པར་སྣང་། །ནམ་མཁའི་དབྱིངས་ནས་སྐུ་ལུས་མི་
2-1-128a
སྣང་བར། །མཁའ་ལ་རང་སྒྲ་བཞིན་དུ་རྡོ་རྗེའི་ཚིག །ཟབ་མོའི་མན་ངག་ནཱ་རོ་བདག་ལ་གནང་། །ལྔ་བརྒྱ་ཐ་མར་གྱུར་ཏེ་ས་སྟེངས་སུ། །སྐལ་ལྡན་རྣམས་ཀྱི་བློ་ཡི་པདྨ་དེ། །ཁ་བ་ཅན་ལྗོངས་ཁྱེད་ཀྱི་སློབ་མ་ཡིས། །འདུན་པར་འགྱུར་ཞེས་རྗེ་བཙུན་བླ་མའི་གསུང་། །འགྲོ་རྣམས་བདེ་མཆོག་འབྲས་བུ་རྒྱལ་གྱུར་ཅིག །དཔལ་རྡོ་རྗེ་ལུས་མེད་མཁའ་འགྲོ་མའི་ཆོས་ཞེས་བྱ་བ་རྫོགས་སོ། །དགེ་ཞིང་དར་རྒྱས་སུ་གྱུར་ཅིག། །།


目录
མ་ཧཱ་མཱ་ཡཱའི་གདམས་ངག་བཀའ་བགྲོས་དོན་དྲུག